Fernando González-Zalbak ERC Consolidator Grant lehiakorra eskuratu du

Fernando González-Zalbak, Ikerbasque ikertzailea nanoGUNEn eta ingeniari nagusia Quantum Motion-en, Europako Ikerketa Kontseiluaren (ERC) Consolidator Grant ospetsua jaso du. Dirulaguntza horrek QuDos proiektua finantzatuko du, puntu kuantiko erdieroaleen erabileran oinarrituko den ekimen berritzailea, ordenagailu kuantikoetarako kontsumo ultra baxuko mikrouhin bidezko qubiten kontrol- eta irakurketa-elektronika garatzeko. Ikerketak aplikazioak izan ditzake ere konputazio kuantikoaren modalitate guztietan erabiltzen den elektronika klasikoan, siliziozko qubitetatik haratago.

“Eskala erabilgarrian konputazio kuantikoa egiteko sistemak sortzeko erronka handienetako bat da elektronika klasikoak sortzen duen energia-disipazioa kudeatzea, qubitak kontrolatzeko eta irakurtzeko ezinbestekoa baita. Konputazio kuantikoaren modalitate guztiek aurre egin beharko dioten arazoa da hau, sistema integratu bat eraiki nahi bada”, azaldu du González-Zalbak. “Oso pozik nago gure proposamena hautatua izan delako; horri esker, puntu kuantiko erdieroaleak erabiliz erronka honi aurre egiteko eta siliziozko pieza bakarrean prozesadore kuantikoak eta elektronika klasikoa konbinatuko dituen pakete integratu bat garatzeko gure ideia aurrera eraman dezakegu”.

ERC Europako ikerketa aitzindarirako finantzaketa-erakunde nagusia da. Ikerlariei proiektu berritzaileak garatzeko laguntzak ematen dizkie Europar Batasunaren barruan. González-Zalbaren laguntza 3.100 eskaera baino gehiagoren artean hautaturiko 349 Consolidator Grant-etako bat da, eta Horizon Europe programaren bidez finantzatzen da. Ikerketa CIC nanoGUNE eta Quantum Motion-en arteko lankidetza-hitzarmenaren esparruan egingo da, nanoGUNEren Hardware Kuantikoaren laborategi berrietan, Donostian.

“Lorpen ikaragarria da hau Fernandoarentzat, eta bere bikaintasun zientifikoaren eta etorkizuneko ikuspegia duen lidergoaren erakusgarri”, adierazi du James Palles-Dimmock, Quantum Motion-eko CEOak. “ERC Consolidator Grant proiektu honek islatzen du Quantum Motion-en egiten ari garen ikerketa industrial teknikoaren maila sakona. Pozik gaude Fernandoaren ikerketa babestearekin, eta silizioan oinarritutako arkitektura integratu batek CMOS transistore teknologia tradizionala erabiliz eskala handian tolerantzia eta erabilgarritasuna lor dezan aurrera egiteko”.

“Duela urtebete sortu genuen nanoGUNEn Hardware Kuantikoan ikerketa-talde berria, Fernando González-Zalbak gidatua—Ikerbasque programaren bidez sartu zena—, eta berriki amaitutako Dorre Kuantikoan berariazko laborategi berriak eraikitzearekin eta Quantum Motion-ekin sinatutako lankidetza-hitzarmenarekin batera, gure nanozientzia kuantikoaren ikerketa-ardatza sendotzeko urrats garrantzitsua izan da. Orain harro gaude lorpen berri honekin, Quantum Motion-ekin batera eraikitzen ari garen ikerketa-proiektua are gehiago indartuko duelako”, adierazi du Jose M. Pitarkek, nanoGUNEko zuzendari nagusiak.

ERC-ri buruz

ERC, Europar Batasunak 2007an sortua, Europako ikerketa aitzindarirako finantzaketa-erakunde nagusia da. Edozein nazionalitate eta adinetako ikerlari berritzaileei laguntzak eskaintzen dizkie Europan proiektuak garatzeko. ERCk lau laguntza-eskema nagusi eskaintzen ditu: Starting Grants, Consolidator Grants, Advanced Grantseta Synergy Grants. Proof of Concept  laguntza-eskemaren bidez, ERCk laguntza-jasotzaileei laguntzen die beren ikerketa aitzindariaren eta merkaturatzearen lehen faseen arteko tartea gainditzen. ERCa gobernu-organo independente batek gidatzen du, Kontseilu Zientifikoak. 2021eko azaroaz geroztik, ERCren aurrekontu orokorra 2021-2027 aldian 16.000 milioi eurotik gorakoa da, Horizon Europe programaren barruan, Ekaterina Zaharieva Europako Batzordeko Startup, Ikerketa eta Berrikuntzako komisarioaren ardurapean.

CIC nanoGUNE-ri buruz

CIC nanoGUNE Nanozientzia Ikerketa Kooperatiboko Zentroa Donostian kokatutako ikerketa-zentroa da, nanozientzian eta nanoteknologian maila goreneko ikerketa egiteko helburuarekin sortua, Euskal Herriko garapen ekonomikoa areagotzeko asmoz. NanoGUNE Espainar Estatuko Ikerketa Agentziak aitorturiko Maria de Maeztu bikaintasun-zentroa da.

www.nanogune.eu

Quantum Motion-i buruz

Quantum Motion-ek konputagailu kuantiko osoak garatzen eta ezartzen ditu, 300 mm-ko CMOS oblea teknologia estandarra erabiliz fabrikatuak, helburua izanik eskala erabilgarrian tolerantzia eta merkataritza-bideragarritasuna duten sistemak eskaintzea. Funtsezko alderdia da krioelektronika garatzea, qubitak kontrol-zirkuitu klasikoekin integratuz, tenperatura kriogeniko sakonetan funtzionatzeko gai direnak, eta horrek prozesadore kuantikoen eskalatze bortitza ahalbidetzen du. Erroreekiko tolerantziaz hornitutako konputazio kuantikoak algoritmo kuantiko indartsuenak exekutatu ahal izango ditu, gaur egun trataezinak diren arazoak konpontzeko, kimika, materialen-zientzia, medikuntza eta adimen artifiziala bezalako arloetan. Enpresak 100 pertsona baino gehiago ditu Erresuma Batuan, AEBetan, Australian eta Espainian, eta teoria kuantikoan, hardwarean, sistema-ingeniaritzan eta softwarean adituak biltzen ditu. Informazio gehiago: www.quantummotion.com.